Caad, gila hanki so tawii ko e dow sikke wonanoo, hannde hannti laaɓi. Ɗum woni maayde lunndiyankeejo noddirteeɗo Yaya Dillo. O lunndiiɗo laamu faddewu nguu mayi ko caggal nde barmanɗe ɗe o heɓi e nder tiindondiral e konunkooɓe waɗungal hanki e ñibiirde fedde makko PSF. Umar Mamadou SOW
Saakitaama ñannde : 29/02/2024 – 16:44
1 mintj
Ko kabaaru mo porokireerjo suudu ñaawirdu ndun Njamena googini. Gila hanki nanallaaji ɗii puɗɗi saraade kono alaa ko laaɓnoo heen. Kanko Umaar Kebellay ko e yeeso jaayndiyankooɓe o lollini oo kabaaru maayde oo lunndiyankeejo gila hanki. O holli wonde, Yaya Dillo waasi fittaandu mum ko caggal gaañanɗe ɗe o heɓi e dillere waɗunde to ñiiɓirde fedde dawro makko PSF. Ɗum ko e saha nde ɓe hollanno mette maɓɓe e nangugol gooto e maɓɓe tuumanooɗo etaare warngo feewde e hooreejo suudu ñaawirdu toowndu leydi ndi. Ko ton konunkooɓe ɓe tawi ɓe, tiindondiral waɗi hakkunde maɓɓe haa ndee boomaare waɗi. Wiyaama kadi wonnde ko yimɓe buy ngaañiima, fodde 26 pawaama junngo.Ɗum ko gila janngu waɗi jamma talaata no weeta alarba e nder cuuɗi ñukinantooɗi laamu kabaaruuji. Yimɓe ɗuuɗuɓe maayi e mum e bi’ol laamu Caad eɓe tuumiri nguu njanngu fedde PSF nde Yaya Dillo ardiii.Ɗum ko caggal nde saakitaa ñalaande yuɓɓingol woote hooreyaaku leydi ndii. Suɓngooji ɗi hooreejo laamu faddewu nguu Mahamaat Idriis Debi e o lunndiyanke Yaya Diallo baraaɗo cuuɗaani anniya ƴamde lefol laamu nguu. .
