Senegaal, sate jooma en gollorɗe walla mbiyen patronaa njiyndirii e hooreejo leydi o, Makki Sall ñalnde Naasaande (Alkamiisa) 8 Korse to galle laamorgo to. He biyɗe maɓɓe addiɓe ko yettinde nunal ngam woni fayndaare mum ko yiylaade jam he oo tuma nde leydi ndii woni he fitinaaji ɗi ene teeŋtina ɗum en, seppooji e dillere waɗnoonde balɗe jawtuɗe ɗee haa ko ene wona sappo e njoyo neɗɗo maayi heen he nder Dakaar kanum e Sigaacoor.
Caggal nde joginooɓe konnguɗi ɓe mbaɗi gooɓe jiile, ɓe kollitii addiɓe ko yiylaade holno ɓe mbaawi wallirde yimɓe waasɓe koreeji mum en e jawɗeele mum en he nder ɗee joljole, kono kadi ko ɓuri teeŋtude e ko addiɓe ko ƴeewde holno waawi waɗeede ha jam waawa artude he leydi he.
He konngol Adama Lam mo CNES, kadi kalfinaaɗo konngol mum, e Baydi Añ mo CNP, sate oo yettinii kadi nelal jamyamal F24 ɓeɓe keɓi jooɗodaade ko adii nde ɓe ngarata to mawɗo leydi o.
Nde hooreejo leydi o ɓami konngol, o jaɓɓiima sate ɗee, o muññintiniiɓe kadi o hesɗitinii pellital laamu nguu e walludeɓe ngam bonanndeeji e baasal mawngal janngal he jawɗeele maɓɓe.
Haysinno hooreejo leydi o yettii jooma en gollorɗe jey-keertiiɗo ɓee ne, Makki Sal siftiniiɓe ko kanum adii yiɗde kadi e noddude he jam, kono noon ko he dow ɗowtaade jojjannde, kuule e mahanteeje (des institutions) teeŋti noon kadi tawa ko he dow goonga. O ɓeydi heen kadi wonnde so F24 ene yiɗi yeewtideede damuɗe kaaldigal ngenndi ene udditanii ɗum haa yaaji. Hooreejo leydi o biskitii miijo F24 wiyde ene mbaɗa seppo he tuma nde ɓesnguuji Senegaalnaaɓe keewɗi ene ngoni he sunaare cuwaa hay seertude e janayse. “Wonaa timmal wiyde ene waɗa seppooji jooni ɗo leydi ndii gasnaani tawo hay ubbude maayɓe mum.” Hooreejo leydi o feldiɓe.
Hooreejo leydi o artii kadi he dillere waɗnoonde nde. O wiy wonnde, ɓeen fayndaare mum en wonno ko laƴnude leydi ndii, ko ɗuum waɗi ɓe kuccini bonanndeeji maɓɓe ko he sektoraaji jogiiɗi nguurndam leydi ndi ɗi, ko wayno isinaaji ndiyam e jeyngol kam e jeereeji.
Like this:Like Loading…
