To Niijeer, caggal nde laamu Mohammed Bazum liɓaa ñannde 26 lewru 7ɓuru, njanguuji no teskeede e nder leydi ndin. Hanki ko ɓuri konnunkooɓe sappo waraama e fiyande nde kuliyankooɓe ɓen waɗi e dow konu leydi ndi to wuro Profit ka seraaji keerol hakkunde maɓɓe e Burkina Faso. Humpito Abdullay JALLO
Saakitaama ñannde : 16/08/2023 – 16:36
1 mintj
Ko konunkooɓe sappo e njeeɗiɗo waasi pitaali mun, ko ɓuri ɓe nogayo gaañi. Ɗum ko e nder fiyande nde kuliyankooɓe ɓen waɗi e dow konunkoɓe Niijernaaɓe e ngal diiwal ka sera keerol Burkina Faso. Ko elikopteer non naɓi maayuɓe ɓen e gaañiɓe ɓen fuu Ñiyamey hanki kiikiiɗe. Nden ñannde tigi, kiikiiɗe kuliyankooɓe ɓurɓe teemedere waɗɗinooɓe motooji walla mobilaaji naatuno kadi e nder Srakoira, wuro wontirngo hirnaange diiwal Tilaberi. Kono ɗoon andaaka tawo yeru mayɓe ɓen e gaañiɓe ɓen. Ko ɗun ɗoo woni fiyande jeediɗaɓere ɗe kuliankooɓe ɓen waɗi gila laamu Mohammed Bazum liɓaa ñannde 26 lewru jeeɗiɗaɓuru ndee hitaande ɗoo. Gila konu ngun jatti laamu ngun, yoga e konunkooɓe wonunooɓe e diiwe goɗɗe e nder leydi ndin naɓaama Ñiyamey. Ɗum ko ngam ɓe semnbina darnde wonuɓe ka laamorgo leydi ndin caggal nde fedde CEDEAO kambi nellugol konu maɓɓe ngun ngam jatta laamu ngun jonita ngu Mohammed Bazum.
