Guinée, ko yimɓe cappanɗe woni ko maayi e lannoode ndee yontere faltiinde e nder leegal Dar – Es –Salam, e nder Conakry. Ko mowre tuundi walla ñooge wonnde e ngaal leegal woni ko saami e hoore cuuɗi yimɓe hoɗuɓe sera mayre. Sifa ndee kasaare wonaa jooni fuɗɗi. E hitaande 2017, yimɓe 9 maayno ɗon caggal nde ndeen mowre tuundi yani e hoore maɓɓe.
Gila ɗum, hooreeɓe leydi ndin, hino aadi eggingol ndiin toondi wonundi e yimɓe hoɗuɓe sera ɗon. Kono haa hannde ndeen eɓɓoore laataaki. E bi’ol Ibrahima Aminata Diallo, neɗɗo sosiyete siwil Guinée, immiiɗo dari fii yoo ndee mowre tuundi egginee, ko welsindaare tan saabi ɗee mayeele. Ko kanko woni koɗo men hannde. Himo jaaboo laamnde Ibrahima Timbi Bah.
