Ñalnde 23 Siilo jaayndeeji Nijerya kabrii wonnde hooreejo Miyettii Allah Kawtal Hoore, Abdullaay Bello Boɗeejo, ɓurɗo lollirde Laamiiɗo Fulɓe Afrika, laamu fawii ɗum junngo. So en tuugniima he ɗiin jaayndeeji ko wayno Agriculteur, wiy saabii nanngeede-mo ko sabu makko tafde konu sukaaɓe Fulɓe aynaaɓe, ko wiyetee he ɗemngal Engele “Vigilante group”. Balɗe seeɗe ko adii ɗuum yiyaama kanko Bello Boɗeejo e terɗe Fedde makko yantude e yimɓe laamu Nijerya, e ɓe njuɓɓini kawtal mawngal e ɓe kollira ɓaargol ɓeen sukaaɓe heblaaɓe mbele maa mbaaw reende Fulɓe aynaaɓe e jawɗeele mum en he nder dawla Nasrawa. Ko balɗe seeɗa fawtii heen, terɗe yuɓɓo Halfinaango ndeenka e kisal Nijerya (DSS), yantude e huunde soldateeɓe konu Nijerya ngari ɗo ñiiɓirde fedde ndee ñalnde Mawbaare 23 Siilo, saanga 3:40 kikiiɗe.
E biyɗe jaande Agriculteur, wonnde gooto e terɗe DSS mo nelaaɗo maɓɓe jokkondiri hollitii wonnde o jaggiraa ko sabu tafde ngaal diɗɗal reenooɓe, sabu ene hula ɓe ummina fitina he nder leydi ndi. Oon fawi heen kadi wonndi diɗɗal ngal winnditaaki ngam laawɗineede, wonaa he DSS, Polis walla ni hay yuɓɓo wooto halfinaango ndeenka e kisal, ɗuum saabi ngal wonaa laawɗungal he jiyɗe laamu federal ngau. Haa jooni kamɓe jaaynde ndee ɓe mbiy ngam yiɗnoode ko laaɓi e tabitinde kaan haala, jokkondiraaɗo maɓɓe o etiima heɓde kalfinaaɗo konngol DSS woni Dr Peter Afunanya, kono oon jaabaaki telefon makko e binndol makko kala.
Saalih Al-Hasan, koolaaɗo kuuɓal Miyetti Allah Kawtal Hoore, fedde nde Bello Boɗeejo ari nde, kanum heɓii haaldude e jokkondiraaɗo maɓɓe, kadi tabitinii wonnde hooreejo mum en nangaama, tawi kadi ko DSS e yimɓe konu Nijerya, nanngi ɗum. Kono oon wiy he ngaan saanga ko wonaa sabu tafeede diɗɗal sukaaɓe reenooɓe ɓee addani mo nanngeede. Oon habrii wonnde nde diɗɗal ngal tafetee nde, ceŋɗe laamu nguu fotnooɓe tintineede ɓee fof tintinaama, ko wayno DSS, konu Nijerya, e hooreejo Polisaaɓe ɓee, kamɓe fof ɓe tintinaama. Teeŋtinta ɗum ko ñalnde diɗɗal ngal gaynata hebleede ndee yimɓe laamu ngu iwruɓe he ceŋɗe limaaɗe dowɗee fof ene tawtoranoo.
Ene jari teskaade tan wonnde diɗɗe ndeenka (Vigilante group) ko huunde laawɗunde he nder Nijerya, kadi ene tawee he nder nokkuuji maɓɓe keewɗi.
Gila ndeen haa joni o woppitaaka, kadi yimɓe makko nganndaa ɗo o heedi. Mbele o woni ko he juuɗe DSS walla juuɗe konu Nijerya, ɓe ngannda, kadi ɓeen njaɓaani haalande ɓe laaɓi.
Darnde maɓɓe hannde ko yoo laamu nguu woppitmo walla so won bonannde ɓe tuumimo ɓe ngaddamo he yeeso ñaawooɓe.
Abdullahi Bello Boɗeejo, ko ɓurɗo sirŋinaade he daranaade Fulɓe aynaaɓe he nder Nijerya, kadi goƴaaɗo kala Fulɓe torlateeɓe to ngoni he nder Afrik, teeŋti he nder leydi Nijerya.
Like this:Like Loading…
Montée link
