Ñalaande wooteeji ɗin suɓaama, ko ñannde 24 lewru 3ɓuru, Sidiki Kaba toɗɗaama hooreejo jaagorɓe, Aamadu BA ittaama e ngardiigu jaagorɓe fii yo waawu toppitaade oorngal wooteeji.
Saakitaama ñannde : 06/03/2024 – 23:14
1 mintj
Senegaal: ñalaande rogere anarere wooteeji ɗin suɓaama ñannde 24 nduu lewru. Sidiki Kaba jaagorɗo halfinaaɗo fiyakuuji leydi ndii, toɗɗaama hooreejo jaagorɓe, caggal nde Aamadu BA ittaa e ngardiigu guwerneman on fii yo waawu toppitaade oorngal wooteeji saatiiɗi ñannde 24 lewru tataɓuru. Kabaaru mo huɓeere laamu holliti hannde kiikiiɗe, 6 lewru 3ɓuru. Suudu sarɗinkooru ndun kadi wootii sariya yaaforɗo nannganooɓe e ɗii sepooji waɗuɗi gila hitaande 2021 haa hitaande 2024. Seppooji ɗi yimɓe ɗuuɗuɓe waasi pittaali mum e majji. Siftinde kadi, ko hannde suudu reenooru doosngal leydi ɓaggini e hollitol maɓɓe wonnde ɓe jaɓaali ndee ñalaande 2 lewru 6ɓuru nde jonnde kaaldal dawroyankowal suɓinoo fii yuɓɓingol wooteeji ɗin. E nder maggol ɓe ƴamii yo suɓngooji ɗin waɗu ado happu laamu Makki Sall timmude, ñannde 2 lewru 4ɓuru 2024.
