Liibiya, ko ɓuri yimɓe ujunaaje jowi waasi pitaali maɓɓe, ujunaaje ujunaaje kadi yiitaaka tawo. Ɗum ko caggal ndee waamere waɗunde e talaata yawtuɗo. Ko jogiiɗo konngol jaagorgal halfinaangal nder leydi guwerneman heedirɗo e funnaange Libi holli ndee limoore . Faabotooɓe ɓen no jokki ɗaɓitude si tawii ɓe yiitay woɓɓe e wuuruɓe kono kadi e fureeji. Leyɗe goɗde kadi no jokki naɓande leydi ndin ballot. Abdullay JALLO
Saakitaama ñannde : 14/09/2023 – 13:19
1 mintj
Ardiiɓe leydi ndin andini wonde no gasa ka ndee limoore maayɓe ɓeydoo. Fewdo ɗoo ndiyan ɗan e loope ɗen jattii nokkeeli ɗuuɗuɗi e ɓanŋeeji goɗdi fudnaange leydi ndin. Meer diiwal Derna Abdulmenam Al-Ghaithi humpiti ka teliwision Al Arabya wonde no gasa ka limoore mayɓe ɓen hewta ujunaaje noogay. E ɓi’ol makko ndiyam illam ɗam bonnii cuuɗi cafrirɗi ɗin. Gila hecci hanki fureeji goɗdi yiitano ka sera maayo. Diiwal no satti hewtande saɓu ndiyam ɗan e laawi taƴƴaaɗi, kuuran on kadi ko ko taƴƴi caɗeele teskaama ka talifonji e wi’ide fedde adunyankooyre tambiinde ko faati e ɗanle OIM. Ko ɗum tampini faabotooɓe ɓen ngam waɗude golle maɓɓe ɗen no haaniri. Hanki hooreejo Egipt yamirii yo ɓe darnu daakaaji ka hirnaange leydi fii ka lorriiɓe e nden waamere hoɗa. Hanki e nder hollitol Angleteer andini ɓe jonnii ardiiɓe Liibiya ko fawi miliyon gooto mbuuɗi ero ko ɓe wallitora. Faransi kaɗi naɓɓaniiɓe ko ɓuri faabotooɓe cappanɗe nayo e tonnuuji hewɗi yowitiiɗi e aalaaji ñawndirɗi.
