Mali, konnu leydi ndin anndinii e nder hollitol wonnde ɓe ndiwtii njanguuji tati ɗi kuliyankooɓe waɗi e aset ƴaɓiinde ndee. Ɗin njanguuji waɗaa ko e dow jonnde du’aaniiɓe e daakaaji konu ɗiɗi ka hordoore ( worgo) leydi ndin. Kuliyankooɓe ɗuuɗuɓe waraama e ɗen piyanɗe. Ko ɗum andini ngol hollitol. Ɗee piyanɗe waɗi ko e nder wakatiiji jeego’o. Abdullaay JALLO
Saakitaama ñannde : 18/03/2024 – 12:27
1 mintj
Fiyande addiinde ndee ko e jemma aljuma yimɓe jogiiɓe kaɓirɗe ɓe annditaaka yani e dow postu Du’aañi ngonɗo Banankoro wuro wonngo e nder diiwal Nuga. Kono konunkooɓe ɓen dartiiɓe haa ɓe wari ɗuuɗuɓe e ɓen kuliyankooɓe. Gooto e siwilɓe gaañaa.Fiyande ɗimmere nden ko subaka aset nde waɗi. Ɗoon kadi kuliyankooɓe ko e dow Daaka konnu FAMA wonnka e diiwal Sikaso ɓe yanii e muuɗum. E nder nden hawre konunkooɓe ɓe Burkina Faso wallitii konnunkooɓe Mali e ko yowitii e gollal wi’eteengal Kapidugu. Kuliyankooɓe fuutiiɓe ɓen raɗaa ɓe doggi ɓe yaari ka keerol Burkina. Kono e baŋŋe maɓɓe fedde kuliyankooɓe Jnim anndinii e nder hollitol ngol ɓe ɓanngini wonnde ɓe warii kamɓe kadi konunkooɓe sappo e njeetato, ɓe ƴettii kadi aalaaji kaɓirɗe maɓɓe.Oon subaka ɗon kadi kuliyankooɓe ɓen yani e dow jonnde e nder diiwal Kutiyaala. Kono konnunkooɓe ɓen dartiiɓe haa ɓen jihadiyankooɓe ndogi.Caggal ɗii njanguuji,ardiiɓe konnu Mali weltorii darnde e ballal ɓiɓɓe ɗen diiwe. Ɓe anndinii kadi wonnde konnun leydi ndin ɓurtan semmbinnde daarnde maɓɓe nden ngam haɓude kuliyankooɓe ɓen e nder leydi ndin.
