vendredi 8 décembre 2023
pulaar
    AccueilPulaarRenndoGartugol Ummu Jeŋ “Njuddu Jeeri” he ayaawooji Pulaar. -

    Gartugol Ummu Jeŋ “Njuddu Jeeri” he ayaawooji Pulaar. –


    Lewbi jooni jonɗi, he ko yawti koo, Ummu Jeŋ lollirnooɗo yeewtere mum “Njuddu Jeeri” he nder Piindi TV, nattiino yiyeede he nder ayaawooji teeŋti e kaalooji ɗemngal Pulaar. Jayiino wonnde o ummiima Piindi TV, hayso meeɗaani haaleede ko jey sabaabu ceertugol oo yeewtiyanke ŋanaa mo yeeɓooɓe piindi kala keppatnoo gargol yeewtere mum njuddu jeeri he Piindi TV.

    Njuddu Jeeri ene jeyaa e jeewti Pulaar ɓaɗateeɗe he nder ayaawo hebrirde ɓurɗe yeeɓeede. Ko adii fof ko sabu loowdi yeewtere nde, nde tawno fayndaare ndee ko artirde fof yiytode majjunooɓe e artiroyde yahnooɓe sabu teskeede wonnde leñol Fulɓe hannde he nder Senegaal, way ko no doondiiɗo cengalal julngal ngal ni, yahata tan ko cammeeje ene caama ni. Hannde he nder leyɗeele ɗe Fulɓe tawatee he mum en ɗee kala, teeŋti he nder Senegaal, Fulɓe ko hebbitooɓe muudooji janai tan, ko yiɗde waylude kaan ngonka woni ko ummini ndee yeewtere fatamlamiire, “Njuddu Jeeri”, ko ɗuum ne jey sabaabu ko addaninde horsude he ɓerɗe yiɗɓe leñol Fulɓe e ɗemngal Pulaar. Sabaabu ɗiɗaɓo oo ko njuddu jeere ko yeewtere jalniinde nde hono mum weeɓaani hannde he jeewte Fulɓe. Nde tawno Pulaar jaɓataa won e baylagol alkule he nder helmere, so waɗii hayso helmere ndee maanaa mum waylaaki ne, konngol ngol ene jalnoo, kono ɗuum fof ene waawno dañeede yeewtere nde tekma sinno wonaa ummu Jeŋ woni ɗowoowo yeewtere ndee. Gaagaa loowdi ndi, ballal makko e waɗde yeewtere ndee ko nde woni koo ene mawni. Ummo ko ɓelɗo sawto, ɓelɗo haala, ɓelɗo ƴiiƴam, jaloowo kadi jalnoowo. Maa mbiyaa omo jogii sirluuji no neɗɗo suusnirtee haysinno oon tigi ko kulatnooɗo haalde walla kersoowo, haa o heɓta he hunduko mum konngol Pulaar ngol ene addana yeeɓooɓe ɓee dañde ko ene njala hakke yontere.

    Nde nanaa wonnde Ummu Jeŋ ummiima Piindi TV, kadi yeewtere Njuddu Jeeri nattii yaltude, addaniino yimɓe heewɓe sunaare e yeeweende. Kadi dumunna juutɗo o nanaaka o yiyaaka kadi e hay ayaawo wooto walla haalirde wootere, ɗuum jibiniino kumpa no feewi. He balɗe jawtuɗe ɗee noon ɗuum wayliima no feewi, nde tawno joom njuddu jeeri feeñi he nder ayaawooji keewɗi. Fuɗɗaade he kuccondiral makko e DJ Dou mo Tiitoonde TV, e jaltugol makko he mago heso ene wiyee “Yeeweende” he nder kanaal Hoodeere Pulaagu, kono kadi e yiyeede-mo he mago heso won-ngo e fiileede tawa ko he gardagol Yero Soh, Fuul TV, go tiitoonde mum woni “Nisma Giɗli” ɗuum fof hollirii wonnde Ummu Jeŋ artii kadi o ardi ko e doole e himme hono mo o joginoo hanki e hecci-hanki ngam daranaade ɗemngal Pulaar e ɓamtaare pinal Fulɓe. Kono ko ɓuri weltinde fansuuji Njuddu Jeeri, ko yiyde Ummu Jeŋ ene waɗi yeewtere hesere he nder Fuul TV nde o inniri: “Ɗemngal am Jibinannde Teeru”. Mbele wonaa Njuddu Jeeri artiraa ɗoo he innde mum waccoore? Ko waawi heen wonde fof ne kam, yeeɓiyankooɓe Fulɓe njeewniino Ummu Jeŋ kadi heɓe keppa ko ɓe njiyata yeeso makko e koɓe keɗotoo sawto makko tawa koko duumii.
    Like this:Like Loading…



    Commencement link

    Related articles

    LAISSER UN COMMENTAIRE

    S'il vous plaît entrez votre commentaire!
    S'il vous plaît entrez votre nom ici

    Rester connecté

    0FansJ'aime
    0SuiveursSuivre
    3,912SuiveursSuivre
    0AbonnésS'abonner

    Télcharger l'application Radio Dingiral Fulbe

    spot_img

    Derniers articles