Eeraango Feewde FULƁE

.

En puɗɗorii barkinorde innde GENO Jurumndeero Jaafotooɗo,

Ceekiroowo Niɓɓere Lewlewal,

Gentiniroowo Fewre Jolal Ganndal e Humpito,

Jinganoowo Tooňaaɓe,

Defiiɗo Poolgu Ngoonga.

Musiɗbe tedduɓe,

ko gooto e Ɓiɓɓe FULA hollita on Yi’annde e Eɓɓoore mum wonande Njamu (Jam ), Deeƴre, Nanondiral, e Ɓamtaare ndeer Ruunde men Afre ndee fof, (Ruunde Aafre firti ko _ »Aafriik »_)

teeŋti non e Ciifol Sahleeri ngol , gilla Sudaŋ, haa Senegaal: FULƁE ngoni Leňol GENO Rokki Ɓural keeringal,

saraade e ngool Ciifol, e alɗinirde ngol Nguurndam ndimam: ko adii fof, ina moƴƴi siftinde ko’e men, e siftinde Leƴƴi koɗdaaɗi,

ko Pergol FULƁE hiirnaange Ruunde men Aafre ndee,

addani ɓe Kosam, ɗam GENO Jaarniri _kisam_ e Alquraana mum tedduɗo, wano no jammimiri nih Diine mum oo, Diine _kisɗo_ ( khaalis ).

Noon kadi ne Tiiɓndi men cellundi lomtiindi Teewu ňawgu, wano Ji’e, Ulluɗi ladde, Gundooji, (Gonndo = Huutooru fuɗnaange ), hay Boɗle e Baaɗi.

Noon kadi ne Karallaagal men asde Boyɗi, no inɗe Pulfule wano Aaɓru, Sooƴooru, Gocol, Ba’gal njamminiri nih,

yoo Karallaagal men *waande Ɓulli*, *e Keelɗingol Ngudduɗam*.

Hay Ladde men ndee na jokki seedaade Baɗtane Pinal men lobbal: Casɗe nji’ten na paarna Mosol Pergol Jawdi FULƁE,

ngati Aalundere Caski waawaa fuɗde, keere caggal defeede e Tektekol Duroori,

borditee.

So Aalundere ndee aawaama e Juŋngo Neɗɗo tan, heewaani fuɗnude Lekki keelɗaɗki.

Gese Jawdi men wiini, ceɓi Coňal, ɓuri kadi sellude Tonnaari dow Kuutorgol _ »engere, engrais, fertilisers_ ».

Hay Gawri Masraari e Gawri Kaaba ngardi ko Pergol FULƁE: Masraari iwi ko Leydi Nuuɓe e Egypt ( Masr ); Kaaba, Ngawri Makkaari, iwi ko Leydi Kaaba.

Caggal FULƁE ɓuri wuuroraade ko Ngaynaaka ( Durgol Jawdi) , ɓe ngaccidi Leƴƴi goɗɗi ɗii Ndema ɗiin Leƴƴi Gaweeje.

Gerte ɗee kaaleteeɗe, ko innde Pulal-Fulfulal laaɓngal, iwde e Baɗal _*irtude*_. Telal mayre ko *Yertere*. Noon kadi ne innde *Ňebbe*, iwde e Baɗal *_ňaawɗude_*, firti ko soomde Ngoobu ɓaleewu e ndaneewu. Telel mayre ko *Ňewre*.

Hay Kuutorle Ndema, e Mba’di kuɓtadinndi, ko Pulal-Fulfulde laaɓngal.

Naaɓnal garatngal e Yilo ( Hakkillo ) men, woni hol no FULƁE hannde nguurtitii e Caɗeele ɓurɗe fof saɗtude: hakkunde mabbe e remooɓe, e hakkunde maɓɓe e Laamuuji Leyɗe Sahleeri?

Ngam addande Humpito huɓtadinngo, laaɓngo, laaɓtinoongo ngal Naaɓnal, maa ma’ndito-ɗen Feňňitannde wonnde e dorbude Jol-Jole Taariindi Leyɗeele men,

batinnde kadi ne e Nguurndam hannde:

ndeen woni Njiimaandi Leyɗeele Ruunde Rewre ( Ruunde Orop ) e Winndere hee fof, teeŋti noon e Leyɗeele men.

Ndiin Njiimaandi ko gilla e Jaalogol Ɗemɗe maɓɓe, dow Ɗemɗe men, Ɗowgol Darwugol Leyɗeele men, e daŋkude Faggudu men.

Caggal Wolde winndere 1945, _france_ natti waawde jogaade Semmbe halfude Wertaango hiirnaange Ruunde men Aafre e Kuuɓal ( _ »afrique occidentale française »_), Doole-oole.

Ɓe ngaddi Peeje kese, no ɓe njokkirta halfude ngoon Wertaango, dow yarde Jile ( Kakkillaaji ) Yimɓe wuurɓe e maggo: ko adii fof ɓe *pecciti ngo* Lobboň-Lobɓoň: ngel wi’aa « Senegaal », ngela « Mali », ngela too « Niger », « Tchad », …

Nder Lobbugel fof, ɓe Ƴepti Ɗemngal ɓurgal famɗude haalooɓe, ɓurgal heertaade,

ɓe Ƴelliti ngal Tolno _ »national »_,

dow Dimal men Pulal-Fulfulde, ɓe laŋki e Laaktirɗe wano Rajo, Tele, Jaayndeeji,

ngam yoolde ngal e ngoon Wertaango ( _ »afrique occidentale française »_).

Kadi _ »france »_ na heɓtini fota fota no FULƁE calorii jiimeede, nih woni ɓe ngaddi Peeje goɗɗe, no ɓe ndokkiri jooɗaade e Jappere Laamu LeƳƳi goɗɗi ɗii, e wuurtude ɓe e raardude FULƁE Yitere Kutuya e Ngaňantumaangu.

Nih addani LeƳƳi goɗɗi ɗii ňemmbitde, e jalkitde FULƁE e Magooji ( films, theatre ),

etaade ubbude Ɗemngal e Pinatawaaka FULƁE, egginde ɓe e Geetle, yoo sooynude Ladde ɓe ngaynatnoo (nduratnoo) Jawdi mum’en.

Dawrugol Laamuuji Leyɗeele Sahleeri ɗii wonti tilsude FULƁE Aynaaɓe ( Durooɓe ) haa Ɓiɓɓe Ngenndi natti hay heɓtinde Mbooteeri ( Nafoore ) coomiindi e Kosam e Tiiɓndi Na’i FULƁE.

Nih woni Kosam waɗti rufeede so Ndunngu welii, tawa Laamu nguu na yoɓana Milliaruuji F CFA addoyooɓe Kosam Conndi caggal Leydi ( Yaasi Leydi ); tawa kadi ne ndiin Conndi Kosam comoyteendi na *gatoriɗi*:

*Ngatu* firti ko Joomtogol Ňabbuli daŋkinooɗi ndeer ƳiiƳam, dow Dimandirgol hakkunde Gori Na’i ɓadotirɗi: ( Gori ko Keewal Gorol ) :

Nagge jibina, Ga’el magge ruɗtoo rewa nge, Jibinannde ndee nde rewotira: ɗuum addata *Ngatu*, ( _ »recessive genes predominance »_) : ɗuum addi Kosam Na’i Leyɗeele Orop na heewi ňawnude, wano Jokkule muusaɗɗe, Ɓernde nisnde, Ňawu Suukara…

FULƁE, e Ňeeňal GENO Toowɗo Rokki ɓe, na nganndi Baɗtane Bone coomiiɗo Dewotiral hakkunde Gori ɓadotirɗi,

ɗuum addani ɓe suɓaade Ngaari Kalhaldi e Jofle goɗɗitiiɗe.

Nguun Ngatu na battini titi e Keelɗugol, yoo Cellal Tiiɓndi Jawdi Leyɗeele Orop,

haa ɗum addani Leydi New-Zealand ňemmbude Kuule Tummbondiral Jawdi FULƁE,

ngam hisnude Jibinannde Jawdi maɓɓe e Jolal Ngatu.

FULƁE kadi na nganndi Leɗɗe cafrooje Ňabbuuli Jawdi yoo Yimɓe. Kono ngaal Ganndal horiima nafde LeƳƳi goɗɗi ɗii,

ngati Dawrugol Laamuuji Leyɗe Sahleeri jalkitde, e etaade famɗinde Pinal FULƁE e Jile ( Kakkillaji ) Ɓiɓɓe Ngenndi,

tawa noon Leɗɗe Tuubokooɓe njeeytata en, ko jaati e Leɗɗe men ngittaa,

ňemmbaa e *Cuuɗi Biɗtirɗi* ( _Research Labs_) maɓɓe, ngartidaa e Coguuli caɗɗi, yoo Mooɗndi keewdi nih hay teppude Caasgol Tuppirki kii ( Mooɗndi =: _excipients_; Tuppirki =: _active molecule_ ). Ɗuum addani Leɗɗe Tuubakooɓe heewde Baɗte teppooje ( _secondary effects_ ).

Hay so en ɗoo kaaɗiino tan, en keɓtinat Njaajeendi Halkaare Niɓɓere Jile, ( Kakkilaaji ) addani Ɓiɓɓe Leyɗeele Sahleeri.

Ngam ňawndude ndeen Halkaare, Heɗɗaango Ngaňngu, e Ngaňantumaangu na haani huurteede, ɓe kollee Mbooteeri FULA ndi alaa Keerol wonande ɓe,

e moƳƳinde Guurdigal e Keɓtindiral hakkunde FULƁE e Haaɓe.

Meɗa yiɗnoo, so GENO Rokkii kam Laawol,

jeyeede e naaɓnotooɓe Lefol Laamu ndeer Daawal Cuɓngooli *tijjangal* ɗoo e Lebbi seeɗa, ndeer Ngenndi Senegaal.

• Meɗa yiɗnoo titi ne siftinde, Ngenndi ɓamtortaa muk Ɗemɗe luɓaaɗe: Renndo fof ndeer Ngenndi, na foti walleede no jagginiri Ɓiɓɓe maggo e Ɗemngal yoo Finaa, ɓe tawi.

• Ndeer ɗuum meɗa huuňɗi e semmbinde Darnde Ɗemngal men Dimal Pulfulal, e waɗtude ngal *Seewnde Gannde ɓurnɗe fof toowde*, e ƴellitde ngal *Tolno Ɗemngal-Jokkondiral* hakkunde Leyɗeele Ruunde men Aafre e Mba’di kuɓtadinndi, hakke Darnde, Caňu, Ngowkoltu, Looynde, e Kuufol maggal.

•Titi ne Jaŋde Sukaaɓe na foti tiggeede e ƴaaŋtirɗe e Nduɗtu Faggudu: ndeer ngaal Daawal, meɗa yiɗi ekkinde kala Ɓiɗɗo Ngenndi mba alaa ɗo dawi,

Gollal Pitiramngollaagu: ( _carpenter, (menusier) , electrician, frigoriste_, …. ) .

E ngaal Dawal ina foti haɗeede sooɗde caggal Leydi (yaasi) fof ko waawi moƴƴineede ndeer Ngenndi.

• Meɗa yiɗnoo titi ne si’nude Eeltugol Sukaaɓe ɓee e Ɗoftaare Ɗoosɗe tammɓiiɗe Ne’di, Neɗaŋkaagal, e Jaati Renndo:

Mo jaŋngaani, dawoyaani fof, winnditoo e ngool Eeltugol ( _compulsory civic training, (service civic national obligatoire)_ ) .

Caggal Lulnde lebbi 9, ɓe nelee, gollirde ko ɓe njaŋngi koo, wano tutde Leɗɗe, liggaade e Cuuɗi Ňawndirɗi, laɓɓinde Boli, Bollungi, yoo Koɗorle Ngenndi ndii.

Ɗuum na walla

• ustude Reɓngo Koomtugol Ngamri, Njimri, yoo Pijirlooji Jile maɓɓe,

• eeltude Renndo ngoo e mawninde Pitiramngollaagu,

e softinde Ɓiɗɗo Ngeddi fof mba dawaani,

etaade _*waawande*_ hoore mum, ndeer Mosol faggitanaade hoore mum, dow duysireede Ngalu, e Keɓorɗe Laamu,

Ɗee-ɗoo Ňaasorɗe ( _conducive dispositions, measures_)

na mbeeɓna heɓlande

• ustude Tullondiral Ceewle Faggudu hakkunde Diiwe ɗee ( _reducing of economic empowerment disparities between regions_ ) .

Ndeer Ngoƴa am teeŋtinde ɗee-ɗoo Miile cifii-mi, njiɗ-mi yahrude Ji’annɗe am keeriiɗe.

Ɗuum addani mi waasde ɓaartaade e Lannda ( _parti_ ) ngoota, esi e innde am heeriinde.

Ɓiɓɓe Ngenndi men,

So en mballotirii yottaade ɗee Cooynanɗe loɓɓe,

ma ɗum en wonan, Sikke alaa,

Ngartam nduumiɗam,

Taanikoň men mbasortoo.

Mi ňaagiima kala Ɓiɗɗo Ngenndi addude heen Ballal mum, gila e Fehre lobbere no ɗee Ji’anɗe tabitintee,

haa Jawdi mum ndariindi yoo Ceede mum:

oɗon nganndi fof ko ko yoɓetee: Laaknugol (Publicity), Njooɓaari, yoo Njolnaari Njillu.

En ngonaa jogitiiɓe, kono ko woni Juŋngo GENO saɗaani.

…………

Aaɓnde 7 Juko 2023,

===

Soh Pereejo,

Hooreejo Kawtal Galle Kisal Ngaynaaka,

+221 76 293 16 78

Sikaare billitorde: pereejo@fula-saasannde.net

.