Jonte ɗiɗi caggal nde guwernma keso tafa, hooreejo Senegaal keso o Basiiru Joomay FAY fuɗɗiima toɗɗaade hoolaaɓe mum e ngardiigu yogo e gollorɗe mawɗe leydi ndii. Ɗeen pellitte ko e batu jaagorɗe hanki nguu ɗe ɓamaa. Umaar Mammadu SOW ina artana en toɗɗeede ɓe hooreejo Senegaal resndi golle ?
Saakitaama ñannde : 25/04/2024 – 19:48
1 mintj
Ina jeya e ɓee hesɓe suɓaaɓe, jeneral Maten Faay, gardinaaɗo “engagement police” ngenndi Senegaal. Oo goorko keptinaaɗo e golle mum e nder ndeenaagu Senegaal lomtii ko Jeneral Muusa Faal mo heewɓe tijjinoo maa iw e ndeen jonnde, sabu noon ɓee laamiiɓe hannde ɓooyi ñiŋde golle makko gila eɓe ngoni luundiiɓe.Ina jeya e ɓeen suɓaaɓe kadi Waali Juuf Bojaan gardinaaɗo Poor mo Dakaar, jonnde ɗo Muntaga SI jooɗinoo. Suɓngo wonngo wadenoongo no feewi, ko ngardiigu ayaawi kam e haalirde ngenndiyankoore dowla Senegal hono RTS mo Rasiin Talla adino gila e hitaande 2012. Ko jaayndiyankeejo Cardinal Ale Ñaaŋ lomtinaamo e ndeen jonnde. Oon keptinanooɗo no feewi e haalullaaji mum kam e ñiŋooje faade e laaminooɓe ɓe.Apix ko gollorgal tambiingal golleeji mawɗi ɗi laamu ngu. Ko bi’eteeɗo Bakkari Seega Baccili joƴƴinaa ɗoon e lomtaade Abdullaay Balde, meer kiɗɗo mo Ziginshoor.SN HLM, gollorgal toppitingal alhaali koɗoorɗe fawaama e juuɗe Bsiiru Kebe. Oon lomtii ko Mammadu Jaañ SI.Timmii yimɓe 14 ɓe hooreejo leydi ndi suɓi hanki. Waylaare ina tijja maa jokku e yeeso gollorɗe goɗɗe.
