Caggal nde samminere laamu Niijeer ronki laataade, yalli hooreejo leydi ndii ƴettii konngol fii deeƴingol ɓerɗe yimɓe ɓen, weltanoo cemmbe kisal e ndeenaagu leydi ndii? Ko ɗum widiyo wonɗo e yiilaade e dow mejaaje renndo, saakitaaɗo e keewal wi’i. Kono oo widiyo jeydaa e oo alhaali murtal konunkooɓe waɗungal jemma 28 no weeta 29 jeetataɓuru 2026.Tijjaani Maalun BARI no firtana en ɗum.
Ko honno ɗee kumpite pene weyniraa e dow mejaaje renndo? Gila balɗe widiyo no holliraa wa si tawii Abdourahamane Tiani, hooreejo Niijeer ƴettii konngol caggal ndee etande samminere laamu waɗunde Ñaamey ka maayɗe nduu lewru 8ɓuru. E nder widiyo on, no yi’ee hooreejo leydi ndii no totta horma e teddungal konunkooɓe leydi ndii, tentinii ɓen maayanɓe ngenndi ndii.
Originaire taƴaangal © Originaire taƴaangal e mbodo
E bi’ol saakuɓe ɓen, ko caggal nde samminere laamu nden ronki laataade, o waɗi ndee yewtere makko naneteende e oo widiyo. Siftinen wonde ñannde 28 lewru 8ɓuru guɓal konunkooɓe etino jogagol daakaa e nder laamorgo ngoo. Tuugaade e bi’ol laamu nguu konunkooɓe fawɓe jikke e ardiiɓe ɓen huɓindino alhaali ko yaawi sut. Ko holnde oo widiyo laatinaa tigi-rigi? Ko ado walla ko caggal oo alhaali? Oo widiyo ko mo lewru sappaɓuru hitaande 2025. Ado nduu murtaldu konunko waɗude. Ko Tilaberi o laatinaa, ɗum ko e njillu ngu hooreejo leydi ndii waɗi e nden falnde tawi himo yahi e daaka Tera.
Originaire taƴaangal © Originaire taƴaangal
Ɗii mbodooji yaltinano e kelle mejaaje renndo laamu ngu no jeyaa e ɗen salut lawɗinaango CNSP. Mejaaje niijernaaje goɗɗe kadi saakuno ɗin mbodooji. Ɗum fow hollii wonnde oo widiyo ko kiɗɗo e kadi ko yaltinaaɗo e caccudi muuɗum. Ko holɓe woni caggal ɗee kumpite pene e ko woni faandaare maɓɓe? Hay si tawii laaɓaali ko honɓe woni caggal oo widiyo yaltinaaɗo e caccudi mum. Kono no laaɓi pos wonnde ko kelle renndo ɗe softiyankooɓe e jinnganooɓe ardiiɓe leyɗe sahel ɓuri saakitude mo. Kuntuuji maɓɓe no woowi saakugol hono ndii loowdi waccoori walla manoori golle ardiiɓe leyɗe AES. No waawi wonnde tawa faandaare oo widiyo ko ɓeydugol semmbingol Abdurahmaan Caani. Hollugol wonnde o huɓindino law oo alhaali samminere laamu e kadi haa jooni ko kanko woni ka burgal. Kono seedeeji buy hollii wonnde ko widiyo heccuɗo ndee etannde samminere laamu. Ko widiyo laatinaaɗo lebbi sappo ado ndee dillere waɗude Ñaamey.
