Hervé Fennec suɓaama eeltude kippu leydi Côte d’Ivoire. Ɗum ko caggal nde nanondiral golle eeltoowo kiiɗɗo oo, woni Emerse Fae, gasi. Gila ndeen noon, kabaaru gooto mo woodaani ina jaalii e dow mejaaji renndo ɗii, ina wiya wonnde Emerse Fae wontii eeltoowo kippu leydi Mali. Ndeen fenaande addii jiyanɗe keewɗe e dow mejaaji renndo ɗii. Heewɓe ina kolla weltaare maɓɓe, tawo noon hay huunde alaa ko woodi heen. Ko e ndee toɓɓere kippu soit pirtoowo kumpite pene arti e ndee yontere.
Holno ndee fenaande holliraa e dow RS kadi holko haalatee e mayre ? Binndanɗe keewɗe ina njirloo e dow Tiktok. Keewɗe e majje ina kollira Emerse Fae ina ɓoorni wutte walla pull-over kippu Mali. Ina yiyee kadi e yoga widewooji daɓɓi ɗo fettiyankooɓe kippu Mali ɓee ngoni e hollude weltaare maɓɓe. E widewooji goɗɗi kadi, eɗen njiya Emerse Fae ina haalda e yimɓe. Widewooji ɗii ina njahdi e daaɗe ɗe IA moƴƴini. Daaɗe ɗee ina kabra wonnde gonnooɗo eeltoowo kippu Côte d’Ivoire oo, Emerse Fae suɓaama wonde eeltoowo kippu Mali. Ko maa njiyaa ko yimɓe ɓee mbinndata e les widewooji ɗii, nde paamaa wonnde ko ɓe gooŋɗinɓe oon kabaaru. Haaɗaani ɗoon, waŋngatooɓe e dow Tiktok heewɓe kuutoriima originaire Emerse Fae ngal ngam waɗde widewooji, eɓe kola jiyanɗe maɓɓe. Won heen ina mbeltii e ngal pellital, kono woɗɓe mbiyi ko ardiiɓe Côte d’Ivoire ɓee potaanoo seertude e Emerse Fae. Ndeen ne dee oo kabaaru ko fenaande ɓaleere kurum. Ko hol daliilu njogiɗon ngam wiyde ɗum ko fenaande ? Oo kabaaru lawɗinaaka hay nokku. Wonaa Emerse Fae, wonaa Fedde huufnde fukubal Mali (Femafoot), kadi hay jaaynde wootere saaktaani oo kabaaru. Etee ko ɗii ngoni calɗi kaanɗi yaltinde oo kabaaru so omo woodnoo. Ko wonaa ɗuum koo Mali kañum nih dañii eeltoowo keso gila 5 lewru 6ɓuru yawtundu nduu. Oon ko Antony Da Silva, faraysenaajo mo iwdi mum woni Portugal. O yahratee ko e duuɓi 46. Nde o suɓatee ndee, Emerse Fae nattaano tawo wonde eeltoowo Côte d’Ivoire. Oon sahaa omo hebla kippu Côte d’Ivoire oo yahde foolotiro aduna 2026. Tawde noon Mali kam dañii eeltoowo keso haa gasi, Emerse Fae waawaa wiyeede suɓaama wonde eeltoowo kippu Mali. So wonaa tawi kippu gooto ina waawi jogaade eeltooɓe ɗiɗo. Waɗde hol wonɓe caggal ndee fenaande? E maayirde lewru 7ɓuru, nde nanondiral golle Emerse Fae hesɗitinaaka, salut wooto Twitter, jooɗiingo to Côte d’Ivoire, waɗi naamndal, E so Emerse Fae suɓanooma wonde eeltoowo Mali? Ngoon ɓayyinaango addii haallulaaji keewɗi e nder Enternet, jeewte ɗee ɓeydii e dow mejaaji renndo ɗii. Yimɓe heewɓe moƴƴinooɓe geɗe kadi ɓayyinooɓe pene e dow mejaaji renndo ɗii tuugniima e ɗiin nan-nanti ngam sarde ndeen fenaande. Faandaare maɓɓe ko ɓeydaade heɓde yimɓe yeeɓooɓe-ɓe.
