E talaata faltiiɗo, konu Mali heɓtii Kidal, saare nde murtuɓe CSP joginoo ɓurii duuɓi sappo. Ko kolonel Asimi Goyta yaltini ngol hollitol nantinngol wonnde Kidal wontii e juuɗe ardiiɓe Mali . Kono ko ballal mersenerɓe Wagner neweni ngol heɓtugol ndee saare. Ɓee mersenerɓe yi’aama e nate ɗe yimɓe Kidal ɓami. Huunde nde woowaaka yi’eede. Sabu hari yimɓe Wagner ko suuɗiiɓe. Holko saabii e ngol laawol ɗoo ɓe jaɓii yaltude e nate walla e mbooji? Ko holno jokkondiral maɓɓe e konu Mali saatii wa’ude ? Ko Saajo Morel Kante wiɗtotooɗo, woni koɗo men hannde. Himo jaaboo lamande Sori Ibrahiim. Ko Ummu Bah e Timmbi Bah, firi ɗii konnguɗi.
Saajo Morel KANTE,hertorɗo kisal e nder sahel. © Sadio Morel KANTE