E ndee yontere ɗoo, Tijjaani Maalun BARI no artana en e toɓɓere hittunde sanne. Toɓɓere haɓɓodiinde e Demokarasi e nder duunde Afrik. Ɗum le ko anndugol ko honɗum woni Kumpite Pene e ko ɗe waawi battinde e ɗii suɓngooji wonaaɗi e yuɓɓineede Afrik e oo ɗoo wakati ?
Kamerun gaynii wootude ɗee balɗe saaliiɗe, Koddiwaar no habbaa asewe janngo, Gine e Gine-Bissaawo no heblaade ɗoo e maayde ndee hitaande. Mejaaje renndo ɗee wontii tannde hare niimerik, nokku ɗo nananti, funto walla jiiɓude hakkille yimɓe e kabaaruuji ɗi goongaa wonaa e sennditeede e keewal.
Ko holno ɗum wonaa e sañireede, ko holɓe woni caggal mum, ko holno ɗum woni e battinirde e suɓngooji ɗii, e tugaale laamu ɗee e mejaaje ɗee ?
Ngam yewtude e dow ɗee toɓɓe, Tijjaani Maalun BARI no jaɓɓii Salli Bilaali SOW jaayndeyankeejo, hertorɗo firto kumpite pene. Ko kanko ardii GuineCheck. Lowre tefoore kala ko yowitii e kabaaruuji ɗi wonaa goonga. Keɗoɗen ɓe.
Naissance link
