Gardiinooɗo batu Dental Afrik (AU), ɗowngu suɓngooji 23 lewru 11ɓ ƴaɓɓiindu ndu to Gine-Bisaawo, Filipe Nyusi hollitii wonde njeeñtuli ɗii ina waawaa haaleede, te no woodi poolɗo hakkunde ƴamannooɓe 12 ɓee.Gonnooɗo hooreejo leydi Mosammbik, nde o haalnoo e yeewtere nde o waɗdunoo e « Rajo Nacional de Mosammbique », hollitii wonde, e ƴeewde no golle ɗee njahri, njeeñtuli ɗii ina mbaawi yaltineede. Ɗum waɗi ko caggal nde Goomu Tammbiingu Njuɓɓinngol Suɓngooji CNE habri e altine ɓennuɗo oo wonde ngu waawataa jokkude limgol wooteeji ɗii, caggal nde fedde worɓe jogiiɓe kaɓirɗe jani e ñiiɓirde maɓɓe ñalnde 26 11ɓ, hade njeñtudi kuuɓtodinndi ndii yaltude ñalnde 27 ndun lewru. E ngun njanngu. Konunkooɓe ɓe nawno kala kaytaaji kolloji limooje suɓngooji ɗi e denndaangal diwanuuji leydi ndi, kañum e Gaandiije (ordinateeruuji), ko ɓe kuutoranno sabu yaltinnde njeeñtuli ɗi. Saabii ɗum non ko Samminere Laamu waɗnde ton gila yonntere ɓennunde nde, nde konunkooɓe ciwlii Laamu.
Commencement link
