To Niger, konu leyɗeele AES e wallidiiɓe maɓɓe Africa Abri ndiwtii etaare sammire laamu waɗnde to Niamey ñande jamma aljumaa ina aset. Ɓe ndiwtii kadi haa laaɓi njanngu waɗngu to boowal laaɗe diwooje Niamey e daakorde ‘‘Assise 101’’. Ngol ɗoo waɗti laabi tati ko murtuɓe ina njana e ndee daakorde ɗo kaake konu leyɗeele AES keewɗe mooftaa. Konu AES e wallidiiɓe mum ɓe leydi Russie, Africa Abri kaɗii murtuɓe ɓee yottinde faandaare mum en. Deeƴre artii to Niamey, laamorgo Niger, kono konunkooɓe ɓee e Africa Abri nana ndeeni haa jooni galle laamorɗo oo e boowal laaɗe diwooje leydi ndii.
Saakitaama ñannde : 30/08/2026 – 12:23
1 mintj Beru minittaaji janngataa ɗun
Boowal laaɗe diwooje Diori Amany mo Niamey, galle laamorde leydi ndii, daakorde treillis 101 e nokkuuji keewɗi laamu leydi ndii koko ndeena oo sahaa, gila hippannde murtuɓe ɓee waɗii haa hannde. Limoore konunkooɓe AES e wallidiiɓe maɓɓe fedde Africa Abri nde leydi Russie iwaani kadi e ɓeydaade haa jamma kiirɗo hanki. Konunkooɓe heewɓe ummiima e rewo leydi ndii, ɗo wiyatee Ouallam, faade e laamorgo ngoo. No mbiiɗaa nii, oo sahaa deeƴre artii Niamey, haa teeŋti e daakorde inniraande Assise 101, ɗo gossondiral kure ngal waɗnoo hakkunde murtuɓe ɓee e konunkooɓe ɓee. Waɗii maayɓe heewɓe to bannge murtuɓe ɓee, kono limoore laaɓnde hokkaaka heen taw. Konu nguu nanngii kadi heewɓe e maɓɓe, so en tuuniima e widewooji ɓayyinaaɗi e mejaaji renndo ɗii.Ko selli koo, ko konu laamorde leydi ndii e wallidiiɓe mum Africa Abri keɓtii daakorde treillis 101 nde murtuɓe ɓee puɗɗinoo heɓtude haa kikiiɗe aset hanki. Ko ngol woni laawol tataɓol ko aeroport cosmopolite Diori Amany mo Niamey e daakorde treillis 101 ina ndaɗa e njannguuli baaɗi nii, hakkunde jihadiste en e murtuɓe konu leydi ndii. Ko nokku mooftuɗo kaake keewɗe konunkooɓe fedde AES, haa e uranium gaddaaɗo toon ko ɓooyaani koo. Fedde AES waɗii ciimtol ngam anndinde boowal laaɗe ngal e treillis 101 artii haa laaɓi e juuɗe konu nguu. Yimɓe heewɓe kadi njaltii toon kikiiɗe hanki faade e laamorde ndee ngam hollude mballiigu mum en e ardiiɓe leydi ndii.
