Saakitaama ñannde : 21/03/2023 – 22:04
Hooreeji Shiin Xi Jinping jaɓɓaama e altine keeña Mosku. E nder nguu njillu makko habbanoongu ko ɓooyi, o yewtidan e yerondiraaɗo makko mo Ruusiya Vladimir Putiin ko faati e huuwondiral hakkunde Peken e Mosku, kaŋun e alhaali lannugol hare hakkunde Ukreeniya e Ruusiya huunde nde Putiin holli no weltori, no udditanii kaaldal. Faatumata SI SAAWAANE
Nguu njillu ngu Xi Jinping waɗata e nder balɗe tati e nder Mosku, fuɗɗike e ɓawto hitaande gila Ruusiya bagii Ukreeniya. Huunde wonude hannde sabu jiiɓoldu e yanugol faggudu leyɗeele.“Meɗen udditanii kaaldal (Ukreeniya), sikke alaa, men yetidan fii alhaaliiji ɗin fow, no tawaa e ɗin, eɓɓooje mon ɗe men teddini”. Ko ɗum Putiin holli e nder yewtere hakkunde makko e Xi Jinping to Kremlin yewtere yaltinaande ka tete ngendiijo Ruusiya. E bi’ol hooreejo Shiin himo weltorii huuwondiral focciingal hakkunde Pekin e Mosku. London hollii e altine keeña, no tamƴinii ka « Xi Jinping » karhan Putiin fii no ɗii boneeji lannira Ukreeniya. Dawlaaji Ndentuɗi Amerik no tuumi Shiin faale addangol Ruusiya Kabirɗe, kono Peken no yeddi ɗum. Kiyef weltoriiɓe kaŋun kadi ndee eɓɓoore Shiin yowitiinde e artirgol ɓuttu. O torike Xi Jinping yo huutor doole mum e dow Mosku fii no accira hare ɗen. Ngal tummbondiral hakkunde hooreeɓe ɓee ɗiɗo, ko bannginngol nanondiral wonungal hakkunde Ruusiya e Shiin e no leyɗe ɗee ɗiɗi tampiri sabu hare hakkunde majje e leyɗe tuubakooje. Hay si tawii hannde Penken no hatonjini e Mosko, kono ko Mosku ɓuri haajeede e Mosku.