Kala ko ena waɗa won to fuɗɗii, won to ummii, won ko umminiraa. Galle Tabital Pulaaku Farayse walla winndere, miijo mahngo galle fitiramgollaagu ngu ummorii ko e gootal e jaale lenyol noddirteeɗo ceerno Mammadu LOH, guurɗo to Orliyaa e nder leydi Farayse (France) jeyaaɗo to Joŋto nder leydi Senegaal.E hitaande 1990, ceerno Mammadu LOH yahi to fuuta tooro ngam nootitaade e duttagol jiɗnaaɗo makko gorko e joom mum (yo Geno wele jiɗnaaɗo o) nde o arti, o artidi e ngoƴaaji muusɗi mo, e ngaan sahnga o holliti Kawtal Janngooɓe Fulfulde e Winndere (fedde wontunde Tabital Pulaaku Farayse)to fuuta ko jananinkooɓe ɓe ngonaa fulɓe ɓultotoo (ittata) ngaluuji fulɓe, tawi njaggirta walla keɓirta ɗiin ngaluuji ko nyeenyaagu mumen ko wayino sehngo lekɗe waɗta ɗum baafe, mahngo kuɓeeje, baafe jamɗe, feewnitooɓe otooji e geɗe bayɗe noon, alaa heen ko ɓiɓɓe fulɓe toon mbaawani koye mum en. Ceerno Mammadu LOH holliti yiɗi ko leydi ɗaɓɓee, mahee ɗin fannuuji mbaɗta janngineede heen, fulɓe ɓe keblee heen, mbaawa keɓa seedanteeje mum en, faggudu ndu waasa ɓoccitaade e juuɗe fulɓe.
Tabital Pulaaku Farayse jaɓɓii miijo e eɓɓo ceerno o, huccani ɗaɓɓude leydi, tuugnorɗe lelnaa, ɗeen tuugnorɗe ena jeyaa heen ; ƴeewde nokku mo woɗɗaani laawol mawngol, nokku danyotooɗo ndiyam e nokku fulɓe gadiiɗo hoɗeede walla ɓurɗo ɓooyde e nder leydi Senegaal . Wiɗo maɓɓe tawaa aanyam Godo ko e ɗiin nokkuuji jeyaa, won nii nokkuuji goɗɗi cuɓanoo, kono ko Godo keewal rokki yo suɓe. Ko ɗoon godonaaɓe njokkondiraa, njaɓɓii, njaɓi eɓɓo ngo, ndokki TPF leydi ko ena wona ektaruuji 4
Ceerno Mammadu JAH ardinaa goomu toppittoongu geɗe potɗe waɗeede e ndiin leydi fotde dumunna, nde happu yiilirde gasi, ceerno Mammadu LOH gaddunooɗo miijo ngo tottaa yo ardo goomu ngu e ngaan sahnga o jokkondiri e juɓɓinoowo lelngo mahdi ndi e cuuɗi potɗi waɗeede heen ɗi (architecte), oon waɗani mo ɗum.
Tesko-ɗen noon goomungu woni ko e les njiimaandi Kawtal Janngooɓe Fulfulde e Winndere (fedde wontunde Tabital Pulaaku Farayse) Ceerno o jokki golle, caggal nde nokku ngu danyanaa kaayitaaji laawɗuɗi, tawi ko ceerno Ibrahiima Umar KAN (Katante Lenyol) ardinoo fedde nde yahi to nokku ngu aafi tuufeere adannde ngam darnude nokku ngu, e tawtoreede jagge …
Heddii e yiylaade jawdi ngam mahde nokku ngu, hawri e happu yiilirde fedde nde gasii, woɗnde ƴettitii ceerno Sammba TUURE arditii goomu ngu.Yah-ngartaa jokki hakkunde Senegaal e Farayse haa nii e nder leyɗeele goɗɗe, haa …Tommbo-ɗee min e jaaynde faynde, daartol ngol na jokki, hay so engol hulɓinii jaŋtaade !
SOH Muusaa Sammba